समाचार सारांश
- बाँके युनेस्को क्लबले कोहलपुर नगरपालिकामा तिव्र कुपोषण व्यवस्थापनसम्बन्धी तीनदिने प्रशिक्षक तालिम सम्पन्न गरेको छ ।
- तालिमले स्वास्थ्यकर्मीहरूको क्षमता अभिवृद्धि गर्दै समुदायस्तरमा गुणस्तरीय पोषण सेवा प्रवाहमा सहयोग पुर्याउने लक्ष्य राखेको छ ।
- कार्यक्रममा २४ जना स्वास्थ्यकर्मी सहभागी भई कुपोषण पहिचान, उपचार र स्क्रिनिङसम्बन्धी सीप अभिवृद्धि गरेका छन् ।
कोहलपुर (बाँके) : बाँके युनेस्को क्लबले हेलन केलर इन्टरनेशनल नेपालसँगको सहकार्य तथा स्वास्थ्य कार्यालय बाँकेको समन्वयमा कोहलपुरमा संचालन गरिएको तिव्र कुपोषणको एकिकृत व्यवस्थापन सम्बन्धी तीनदिने प्रशिक्षक तालिम सम्पन्न भएको छ ।
जिल्लामा संचालन गरेको पोषण परियोजना अन्तर्गत सो तालिम कोहलपुर नगरपालिकामा सम्पन्न भएको हो । सो तालिमको उद्देश्य सहभागीहरूको क्षमता अभिवृद्धि गरी समुदाय तथा स्वास्थ्य संस्थास्तरमा गुणस्तरीय पोषण सेवा प्रवाह गर्न सक्षम बनाउनु रहेको क्लबले जनाएको छ । तालिममा कुपोषणको पहिचान, उपचार, प्रतिवेदन प्रणाली तथा सहजिकरण सीपमा विशेष जोड दिइएको थियो ।
कार्यक्रमको उद्घाटन सामाजिक विकास समितिका संयोजक ईश्वरी प्रसाद विश्वकर्माको अध्यक्षतामा भएको थियो भने कार्यक्रमको सञ्चालन कोहलपुर नगरपालिका स्वास्थ्य शाखाका जनस्वास्थ्य अधिकृत प्रेमप्रसाद पाण्डेले गरेका थिए ।
संयोजक विश्वकर्माले पोषण क्षेत्रमा पहिल्यै दक्षता भएपनि यस तालिमले ज्ञान अद्यावधिक गर्नुका साथै सेवा प्रवाहमा आत्मविश्वास बढाएको बताए । उनले महिला स्वास्थ्य स्वयंसेविका, सामाजिक अगुवा, आमा समूह र युवा क्लबको सक्रिय सहभागिताले कार्यक्रमको प्रभाव अझ दीर्घकालीन हुने उल्लेख गरे ।
अद्यावधिक निर्देशिका अनुसार सञ्चालन गरिएको सो तालिममा प्राविधिक ज्ञान प्रदान गर्न प्रस्तुतीकरण, समूहकार्य तथा व्यवहारिक अभ्यास जस्ता सहभागितामूलक विधिहरू प्रयोग गरिएको थियो । यसले सहभागीहरूको प्राविधिक क्षमता अभिवृद्धि गर्नुका साथै सरोकारवालाबीच समन्वय र सहकार्य पनि सुदृढ बनाएको आयोजकले जनाएको छ ।
कार्यक्रममा स्वास्थ्य कार्यालय बाँकेकी प्रमुख सुनीता पौडेलको विशेष उपस्थिति रहेको थियो । तालिमको सहजीकरण स्वास्थ्य कार्यालय बाँकेकी पोषण फोकल पर्सन बसन्त मल्ल, जनस्वास्थ्य अधिकृत अनिल कुमार सेन तथा जनस्वास्थ्य प्रशिक्षक अमृत राणाले गरेका थिए ।
प्रमुख अतिथि पौडेलले समुदायको पोषण अवस्थालाई सुधार गर्न प्रभावकारी कार्यक्रम सञ्चालन, सूक्ष्म योजना तथा समयमै गुणस्तरीय उपचार सेवा अत्यन्त आवश्यक रहेको बताईन ।
कोहलपुर नगरपालिकाका स्वास्थ्य शाखा प्रमुख अनिल कुमार सेनले सहभागीहरूलाई अद्यावधिक प्रोटोकल अनुसार काम गर्न आग्रह गर्दै महिला स्वास्थ्य स्वयंसेविकालाई अभिमुखीकरण गर्ने, पालिकासँग सहकार्य गर्दै पाँच वर्षमुनिका बालबालिका र गर्भवती महिलाको स्क्रिनिङलाई प्रभावकारी बनाउनुपर्नेमा जोड दिए ।
साथै उनले बाँके युनेस्को क्लब र हेलन केलर इन्टरनेशनल नेपाललाई प्राविधिक तथा आर्थिक सहयोगका लागि धन्यवाद व्यक्त गरे । तालिममा कोहलपुर नगरपालिकाका वडा नम्बर १ देखि १५ सम्मका २४ जना स्वास्थ्यकर्मीहरूको सक्रिय सहभागिता रहेको थियो ।
हेल्थइरा । २०८२, २८ चैत्र शनिबार